DÍA DAS ARTES GALEGAS

Ola!

O día 1 de abril conmemórase o Día das Artes Galegas, cada ano adicado a un persoeiro da historia da arte galega.

Este 2023 a figura homenaxeada é o trobador vigués Martín Códax.

Queres saber máis sobre o Día das Artes Galegas e sobre Martín Códax? Preme na imaxe para realizar as actividades.

Así sonaba Ondas do mar de Vigo, un dos poemas con máis sona de Martín Códax.

E así é como Amaral versionou este poema, convertíndoo en canción.

Con que versión vos quedades?

E agora que xa sabes moítimas cousas sobre Martín Códax, ponte a proba. Dálle a COMEZAR para seguir xogando e aprendendo!

Agardamos que gozaras coas actividades.

Apertas de bolboreta!

RECANTO POÉTICO

É un feito que no noso cole gozamos moito coa escoita, lectura e creación de poemas. É o que ten vivir nunha terra de artistas como é O Grove 😉

Sabíades que na clase de 3º de Primaria de tanto que lles gusta a poesía crearon un Recanto poético?

Nel podedes atopar poemas ilustrados da talla de Antonio García Teijeiro, Ana María Fernández, María Canosa... ou algún que outro poema escrito por unha poeta que sabemos que hai na aula...

Seguide lendo e creando poemas

Non existe mellor cura para as penas.

Animamos a todo o alumnado

 a encher as paredes de pareados.

Feliz día da poesía!!!

Apertas de bolboreta.

TANIA ÁLVAREZ YATES

Ola!

Esta semana, ademais de contar coa visita das nais, tivemos a sorte de ter no cole a Tania Álvarez, piragüista e campiona mundial de maratón na modalidade K2.

Coa súa personalidade, cercana e humilde, gañouse a confianza da cativada, que aproveitaron para facerlle moitas preguntas. Tiveron a opurtunidade de colgar as súas medallas, ver a súa piragua e ata lles deu tempo a que lles asinase un autógrafo.

Podedes ver este pequeno vídeo da experiencia que vivimos no cole coa súa visita, reivindicando a importancia das mulleres da nosa vila no deporte e máis o valor da práctica de actividade física e a saúde.

Se queredes coñecela un pouquiño máis, non deixedes de ver o seguinte video.

Grazas por todo, Tania. Foi unha honra contar coa túa presencia.

Desexámoste un futuro cheo de éxitos 💜

Apertas de bolboreta!

VALEROSAS

Ola!

Esta foi unha semana moi especial, chea de novas experiencias e, para algunha e algún, chea de orgullo por ter no cole a súa nai.

Tivemos a sorte de contar con varias mulleres (mullerasas) que viñeron contar a que se adican e como é o seu día a día no traballo. Estiveron dacordo con nós en que non existen traballos de homes nin de mulleres e que debemos loitar pola igualdade de dereitos das mulleres, liberdade na toma de decisións. Cómpre visibilizar as súas capacidades e cualidades, valorar e recoñecer os seus logros, para que deste xeito poidan cumprir os seus obxectivos e realizarse como persoas.

Esto foi o que elas compartiron con nós.

Tamara (nai de Xulia, EI) traballa no Mercado.

Silvia (nai de Gabriel, EI) é cociñeira.

Laura (nai de Valentina, EI) é perruqueira.

Noelia (nai de Jaime, 1º EP) é bateeira.

Emma (nai de Greta e Norah, 3º e 5º EP) tamén é bateeira.

Agardamos que fose unha experiencia positiva para todas vós. Pola nosa parte o sentimento é de orgullo e admiración.

Grazas por facer deste 8 de marzo un día tan especial!

Xuntas podemos. Xuntas sumamos. 💪👩

Apertas de bolboreta.

RECOMENDACIÓNS DE LECTURA: 8M

Ola!

Como sabedes, o 8 de Marzo conmemórase o Día Internacional da Muller, co gallo de reivindicar 365 días de igualdade de dereitos.

Na nova exposición de libros do corredor podes atopar unha morea de libros para informarte ou coñecer a mulleres relevantes da nosa historia. E si, Rosalía de castro é unha delas ❤ 

Hai títulos marabillosos. Lembrade pasar por aquí a botar unha ollada, e se vos presta, levar algún emprestado 😉

Apertas de bolboreta!

RESUMO DA FESTA CHOQUEIRA!

 Ola,

Aquí vos queda un pequeno resumo da Festa choqueira para lembrar o ben que o pasamos rodeados das nosas familias!

Que non pare a festa! Gozade da fin de semana nesta vila na que ata as cadelas e os cans visten modelos para a ocasión 😜

Apertas de bolboreta!

PARECE UNHA ROSA

Ola!

Queredes escoitar ás nenas e aos nenos de 3 e 4 anos recitando o poema "Parece unha Rosa", de Rosalía de Castro?

E non so saben recitar! Ollade a manualidade tan fermosa que fixeron. 😍

Moito artista temos no cole, non si?

Apertas de bolboreta.

DÍA DE ROSALÍA

Ola!

O día 23 de febreiro celebramos o Día de Rosalía no cole, unha xornada na que aprendimos unha morea de cousas sobre esta gran muller galega.

Ao día seguinte, tivemos a sorte de asistir a unha sesión de contacontos de "Tarabelos. Títeres e contacontos". Esteban Acuña contoulles aos maiores do cole a historia de "Vidal o sin ventura", un poema incluído na obra de Rosalía "Cantares Gallegos". E os máis cativos, puideron gozar da escoita de Lendas galegas.

Foi marabilloso poder asistir a este espectáculo no que grandes e pequenos, mestras e mestres, divertímonos moitísimo.

Ademáis, Esteban deixounos unha proposta artística surrealista que acompaña á sesión de "Contos nunha roda" para realizar na área de Plástica ou, se vos peta, na vosa casa.

Premede nas ligazóns para acceder aos contidos:

PROPOSTA ARTÍSTICA EDUCACIÓN INFANTIL

PROPOSTA ARTÍSTICA PRIMARIA

Grazas por todo, Esteban!

Apertas de bolboreta!

RUTA ORNITOLÓXICA

O pasado 10 de febreiro, as nenas e os nenos de 3º e 4º de Primaria tiveron a sorte de asistir a unha Ruta ornitolóxica que se desenvolveu na Praia do Fornos, na Illa da Toxa. Alí puideron observar as diferentes aves que habitan a nosa costa a través de prismáticos e telescopios, ao tempo que anotaban nun caderno de campo todas as especies que foron quen de avistar, aproveitando ademais para fotografar todos os marabillosos momentos que nos brindou esta experiencia.

Cormoráns, gaivotóns, espátulas, garcetas, gaivotas choronas... foron algunhas das especies que puidemos observar.

O noso agradecemento a Encarna e a Gustavo, de Seo/Birdlife Pontevedra, por compartir con nós todos os seus coñecementos, pola súa amabilidade e por contaxiarnos o seu entusiasmo e actitude respectuosa coas aves e o medio ambiente.

Agradecer tamén ao Concello do Grove por ofrecernos actividades tan enriquecedoras como esta.

Apertas de bolboreta!

DÍA DE ROSALÍA

Ola!

O 23 de febreiro celebramos o Día de Rosalía de Castro, e que mellor forma de facelo que cantando na súa fala, na nosa fala.

E ti, sabes quen era Rosalía?

Se queres coñecer máis datos interesantes sobre esta gran muller galega, preme nas seguintes ligazóns:

Sinxelo. O Día de Rosalía de Castro

5 cousas que non sabías de Rosalía de Castro

Apertas de bolboreta!