OS MANDADOS DA MECA: LUNS

 

OS MANDADOS DA MECA

É TEMPO DE ENTROIDO!

Ola!

O Entroido está a piques de comezar.

Queres aprender algunhas cousiñas máis sobre esta festa que tanto nos gusta?

Premendo na ligazón podes ler unha chea de información sobre a orixe do Entroido, as diferentes festas tradicionais que hai en Galicia, a gastronomía... E moito ollo! porque tamén se fala do Grove! Serás quen de atopar esta información?

Ligazón: Os Bolechas

E agora que tanto sabes, atréveste con este xogo?

Agardamos que gozaras cos nosos amigos os Bolechas e que aprenderas moitas cousas sobre o Entroido.

Que non pare a festa!

Apertas de bolboreta!

DÍA ESCOLAR DA NON VIOLENCIA E A PAZ

Ola!

No noso cole rexeitamos calquera tipo de violencia, apostando sempre pola resolución pacífica de conflitos e buscando calquera oportunidade para facer comunidade.

Este ano, a celebración do Día escolar da non violencia e a paz foi inesquecible para todas e todos nós: divertido, creativo, emocionante, saudable, familiar...

Dende o centro organizouse unha Andaina pola Paz, na que participaron as familias do alumnado. Máis previamente participamos nun obradoiro de estampación de camisetas a cargo de Andrea Menéndez, ilustradora gráfica e creadora de Carracucarte.

Andrea deseñeou un logotipo para o noso cole e explicounos o proceso de estampación de textís. Coa súa axuda levamos a cabo a impresión da parte dianteira das nosas camisetas brancas, xa na aula, cada un de nós decorou a parte traseira con debuxos e mensaxes de paz.

O luns 30 de xaneiro, realizamos a esperada andaina arredor do cole, acompañados polas familias, nun ambiente festivo onde non faltaron as apertas e a axuda mútua. Podedes ver un resumo da mesma no seguinte vídeo.

Ao chegar ao cole, o alumnado de 3º de primaria leu un manifesto poético pola paz, titulado "O mundo que queremos", que elas e eles mesmos compuxeron axudados pola súa titora.

A continuación, realizaron o acompañamento da canción "Paralá", de Mercedes Peón, utilizando pandeiros, pandeiretas e vasos para a percusión, mentres dúas alumnas bailaban.

Parabéns, rapazada! 💕

Para rematar, Cris, a nosa directora, acompañada das titoras de cada aula, fíxonos entrega dun diploma por ter realizada a andaina e unha chocolatina para repoñer enerxías.

Grazas a todas e a todos pola vosa boa disposición e ese sorriso permanente que nos enche de enerxía positiva.

Apertas de boblboreta!💟💟💟

PREPARÁNDONOS PARA O DÍA DA PAZ

 Ola!

Achégase o Día escolar da non violencia e a paz, e tedes deberes 😜

Seredes quen de aprender o retrouso do "Paralá" de Mercedes Peón? O vindeiro día 30 o comprobamos!

Dádelle a reproducir e gozade desta fermosa canción.

Por outra banda, cómpre amosar o fermoso traballo que fixo a cativada de Infantil. As nenas e nenos de tres e catro anos, axudados pola súa titora, traduciron ao galego e recitaron un poema de Gloria Fuertes. Sabedes cal é?

Así chegou o poema ás casas dos máis pequenos, nunha pombiña voadora cun código QR para visualizar o vídeo ao momento.

Agardamos que vos gustara tanto coma a nós!👏👏👏

Apertas de bolboreta!

RECOMENDACIÓNS DE LECTURA

Ola!

Durante o mes de xaneiro estarán expostos no corredor de entrada diferentes exemplares relacionados coa non violencia e a paz, que podedes ler no recreo ou levar en empréstito para casa.

Ademais, lembrade que este mes virá visitarnos a Cruz Vermella de Vilagarcía de Arousa para contarnos en que consiste o seu traballo. Porán especial atención á situación de desprotección de moitísimas persoas inmigrantes ou refuxiadas que cruzan as fronteiras na busca dun lugar mellor para vivir.

Lede, informádevos, reflexionade e valorade o realmente valioso: estar ao carón da familia, ter un fogar para vivir, comida para alimentarnos, poder ir ao médico ou á escola...

E o máis importante: como vos gustaría que vos tratasen ao chegar a un lugar que non coñecedes?

Xa nos contaredes...

Apertas de bolboreta. 

DESPEDIMOS O ANO

Ola!

O día 22 de decembro, último día de cole do ano, celebramos a nosa particular festa de Fin de ano. O alumnado de 6º de Educación Primaria, axudados pola súa titora Cristina, foi o encargado de presentar e dirixir as diversas actuacións programadas.

En primeiro lugar, algunhas alumnas de 5º de primaria, representaron o conto do "Apalpador e o arco da vella", de Xoa G.

A continuación, as alumnas e os alumnos de 6º de primaria amenizaron a xornada con diversas actuacións e deron as 12 badaladas. Con cada badalada, cada un de nós pediu os seus mellores desexos para este ano que entra.

Mirade que ben o pasamos todas e todos!

Agardamos que este 2023 sexa un ano marabilloso para todas e todos vós, no que non falte a saúde, abonden os bos momentos na mellor das compañías e se encha de novas metas por cumprir.

Feliz Aninovo!

Apertas de bolboreta! 💫💫💫

DESEXOS PARA UN ANO QUE COMEZA

Ola!

Estamos a piques de comezar o 2023, un novo ano no que partillar soños e aprendizaxes coas persoas que máis queremos.

Dende o cole, novamente decidimos escribir unha postal para transmitirlle os nosos mellores desexos a unha compañeira ou compañeiro de ciclo, para posteriormente enviala por correo postal.

O máis emocionante é non saber quen che envía a postal ata o día no que a recibes. Por eso facemos un sorteo alto segredo! 

Rematadas as postais, viu recollelas a carteira de Correos. Que nervios!

Ademais, coa colaboración das familias, cada nena e neno escribiu nun CD de refugallo os seus desexos máis solidarios para o ano que entra. A única condición é que tiñan que desexar algo valioso, realmente importante e necesarios. E xa sabedes que o verdadeiramente valioso non se pode mercar con cartos, non si?

Tan pronto recibimos as aportacións de cada familia, penduramos os CDs nas pólas das árbores do patio.

Que desexos tan fermosos! Que importante todo o que escribistes! Que empatía amosastes con todas as persoas que nos arrodean! ❤❤❤

Orgullo de familias! Grazas pola vosa colaboración e por transmitirlle valores tan importantes ás vosas fillas e fillos.

Apertas de bolboreta.

O APALPADOR E O ARCO DA VELLA

 Ola!

Hoxe tivemos unha actividade moi especial. Dúas nenas de 5º de primaria representaron para a cativada do cole o conto do "Apalpador e o arco da vella", de Xoan G., utilizando un teatro de monicreques.

Que atención puxeron todas e todos!

Moitísimas grazas, mozas! 👏👏👏

Despedímonos cunha canción sobre este lexendario personaxe da nosa tradión, da man do noso querido Paco Nogueiras.

Apertas de bolboreta!

MES DA CIENCIA EN GALEGO

Queridas e queridos apaixoados da Ciencia,

Que ben o pasamos este mes e canto aprendemos!

Para enchouparnos ben de coñecemento e experimentar tanto no cole como na casa, puxemos á disposición do alumnado unha chea de libros sobre diferentes ramas da ciencia.

Nas aulas realizáronse diferentes experimentos, rexistrando os materiais necesarios, o procedemento ou pasos a seguir e as hipóteses do que cada un pensaba que ía acontecer e por que. Ao rematar, observamos o resultado final e tomamos nota da explicación científica do mesmo.

Cos experimentos realizados puidemos comprobar:

• Ao atravesar con lápices unha bolsa con auga, non se derrama case nin gota, debido á presión e forza que fai a auga en cada lapis.
• As nosas pegadas dactilares, que nos identifican e diferencian do resto dende o nacemento. Non hai unha igual a outra!
• O consumo de osíxeno das candeas, que fai que se apaguen soas cando lle poñemos un recipiente pechado enriba. Parece maxia, máis non o é!
• A diferente densidade dos líquidos, culpable de que a auga e o aceite non se mesturen nunca, ao ser este último moito máis denso.
• Coa pementa que fuxe descubrimos que cando botamos pementa na auga, expándese pola superficie, debido á tensión superficial da auga. Máis cando tocamos a auga con un pouquiño xabón, a pementa escapa. Ésto débese a que o xabón rompe a tensión superficial da auga.
• A refracción da luz na auga, que crea efectos ópticos sorprendentes, como puidemos observar.
• Como elaborar iogur natural coa axuda das bacterias e os fermentos.
• A capacidade de estimación que temos as persoas, algo que se pode e cómpre exercitar, xa que vai ser moi útil no noso día a día.

Premede no video para ver os diferentes experimentos 😉 

Animádevos a facer máis experimentos na casa!

Que a ciencia non pare!

Apertas de bolboreta!